Tottenhami ka arritur të mposht Huddersfield Town, duke fituar me rezultat 2 me 0, në takimin e vlefshëm të javës së 29-të.

Skuadra londineze që nga fillimi i takimit ishte më e mirë dhe më dominuese, se sa ajo mysafire.

‘Gjelat’ rrezikuan të parët, nëpërmjet sulmuesi anglez, Harry Kane, por tentimi i tij ishte i pa saktë.

Me kalimin e minutave, skuadra e trajnerit Pochettino, shtoi sulmet ndaj mbrojtjes së Huddersfieldit, pjesë e së cilës ishte dhe ziverani me prejardhje shqiptare, Florent Hadërgjonaj.

Në minutën e 27-të pas një super aksioni të ndërtuar, Tottenhami gjeti golin e parë, nëpërmjet jug-koreanit, Heung – Min Son, i cili me lehtësi kaloi portierin dhe e dërgoi topin në rrjetë për rezultatin 1 me 0.

Vendasit vazhduan me ritmin e njëjtë të lojës, por pa ia arritur të shënonin golin e dytë.

Në fund të pjesës së parë, Huddersfield rrezikoi portën e Hugo Llorisit, nëpërmjet Tom Ince, por goditja e tij përfundoi jashtë portës, shkruan arbresh.info.

Me të filluar, pjesa e dytë Tottenhami pati një rast të shkëlqyer për ta dyfishuar rezultatin, por goditjen e Delle Allit e priti portieri mysafir.

Goli i dytë u realizua në minutën e 54-të, pas një harkimi të bukur në zonë nga Kane, jug-koreani Heung Min – Son, realizoi përsëri, kësaj radhe për rezultatin 2 me 0.

Son ishte afër të kompletonte hattrikun e tij por nuk shfrytëzoi si duhet pasimin e bukur të Christian Eriksenit.

Me këtë fitore, Tottenhami renditet në pozitën e tretë me 58 pikë, ndërsa Huddersfield në pozitën e 15 me 30 pikë. /arbresh.info/